الايفون الجديد واهم ما يميزه من وجهة نظري

 مساء الفل ومن الاول ومن غير كلام كتير بتحب التكنولوجيا اتفضل معايا ومتع عقلك مش بتحبها اوي ومش عايز تزود ثقافتك متتفاعلش علي البوست....نخش علي الاخبار:

العالم كله تابع اخيرا وبعد الاشتياق نزول الايفون ١٢ الجديد.

من الاخر ايفون اعلنت في مؤتمرها عن ٤ انواع للايفون الجديد Mini, iphone 12, pro, pro max واعلنت عن الاسبيكر الذكي الجديد للمنازل.

طب يا سيدي ها في جديد يعني ولا ايفون وتفاحة وفشخره وخلاص؟!

يا جماعة احب اقول لكم ان حرفيا الفون دا يعتبر احدث هاتف في العاااااالم وبدون اي افوره!!!!

اللي يخليني اقولك كده الاتي:

بس قبل ما اكتب اي حاجة انا مش بكتب مواصفات انت ممكن تجيبها من النت انا بقولك الحاجة اللي تخليك تشتاق انك مجرد تشوفه ولو مقتدر تشتريه هتجيبه وش:

اولا وافضلا انه صاحب اصغر واذكي واسرع معالج في العالم A14 فكك من الارقام اللي بيحققها وكده في مقاييس السرعة انما يجي بتقنية ال5G ويكون5 نانومتر!!!!

عارف دا معناه ايه؟

معناه انه بيعالج ١١ تريليون عمليه في الثانية الواحدة🙄🥴

انا فوني هنج وانا بكتبها اصلا🤒😔.

حاجة كمان عملوا تقنية اسمها ceramic shield يعني اقوي من اقوي شاشة هاتف في العالم وهيتعمل اختبارات كسر ومقاومه للشاشة قريب ودي شخصيا جذبتني جدا😘.

عندك الكاميرات لو تسمع المراجعين العرب تلاقيه فرحانين فشخ وبتاع وبيقولك كاميرات ونايت مود وتعديلات بس الصراحة انا شايف انها حلوة وكل حاجة بس مفيش جديد بالنسبة للكاميرا نفسها الا في """السينسور والعدسة"""" وحط تحتهم مليار خط!!!!

معروف عند الايفون خاصية المثبت البصري ois وخاصية الdual pixel انما الجديد هنا هو ان السينسور والعدسة الاتنين فيهم محرك هزاز بيتحرك تلقائي مع حركة ايدك!!! انت متخيل كم العظمه! يعني هتصور صورة ملهاش مثيل! انا مش عايز ادخل في تفاصيل شرحه انما اوعدكم هنزل تفاصيل تكنولوجية قوية لكن في فيديوهات قريب ان شاء الله❤🤍

وفي خاصية ممتازة ولأول مرة في عالم الهواتف الا وهي خاصية Dolby vision بص اي كاميرا فون عادية بتعالج الصور والفيديوهات بتفصل السماء والارض وتنور السماء وتظلم الارض (انا لخصت لك بتاع ٤ صفحات في العلم دا) الخاصية دي بقي بتفصل بين السماء والارض واللي بينهم وبتزود اللون الابيض و بتتقل اللون الاسود يعني هتخلي تجربة مشاهدة الفيديوهات رهيبه لا تقارن حاجة كده اووووف خاااالص🤍🤍🤍🔥⚡🔥⚡

ومننساش خاصية Deep Fusion تعمل في الإضاءة المتوسطة إلى الخافتة على تحليل التعريضات الضوئية المتعددة لزيادة التفاصيل. انظر إلى الفروق في مظهر الخشب والنسيج والكريستال. ولا تنسَ الكاميرا الواسعة للغاية التي تمنحك منظوراً عملاقاً. جبتها لكم لغة عربية فصحة في ابسط طريقة اهو❤🤷🏽‍♂️🤷🏽‍♂️🤷🏽‍♂️

واخر حاجة علشان مطولش هي الشاشة الاقوي في العالم super retina XDR oled مش هتكلم عليها بس اقدر اقولك انها افضل شاشة في العالم! بس الصراحة عملت مقارنه في كذا حاجة بينهم من حيث الالوان والوضوح وقريت دراسات كتير بينها وبين السوبر اموليد لا الصراحة الاوليد اقوي طبعا بس قريبة من السوبر اموليد والاتنين تجربتهم ممتازة عن تجربة❤🤷🏽‍♂️

يعني المؤتمر كان هايل وفيه حاجات كتير لو انت وصلت لحد هنا من القراية ياريت تكمل بقي وتسيب لي كومنت عرفني انك مهتم بالتكنولوجيا وعايز توسع معرفتك بها وان شاء الله مش هخليك محتاج حاجة❤

اخر حاجة احب اقولها لكم انا يعتبر قولت بتاع ١٥% من المؤتمر الحاجات اللي جذبتني الصراحة وقولت لازم لازم اتكلم واااه صح نسيت اقولكم حكاية الكوميك اللي منزله دا😅😅😅

الشركة من الاخر جايبة لك معالج غااالي جدا جدا جدا وحاطه خواص قوية جدا جدا جدا جدا جدا فالطبيعي ان الفون يبقي غالي لابعد الحدود! الله طب كده مش هيتباع اوي ف عملت ايه بقي بنت اللعيبة قالت لك: في علب عائلة iPhone كلّها، استغنينا عن محول الطاقة وسماعات EarPods التي نادراً ما تُستخدم واستبدلناها بكابل توصيل USB-C إلى Lightning للشحن السريع، الذي يحتاجه معظم الناس. وهكذا تصبح العلب أصغر ويصبح بالإمكان تحميل عدد أكبر منها في كل شحنة، ما يخفض عدد الشحنات الإجمالي. ونعمل أيضاً على انتقال موردينا إلى استخدام الطاقة المتجددة، وكل هذا يؤدي إلى خفض إجمالي انبعاثات الكربون بمعدل مليوني طن متري سنوياً.

يعني من الاخر كده عملت لك البحر طحينه وشالت الشاحن والسماعات وصغرت العلبة علشان الفلوس! وانا شايف انها حركة بايخة وملهاش لازمه! بس هم قالوا يعملوا لقطة كده🤷🏽‍♂️

المهم انتظروا المزيد والمزيد في عالم التكنولوجيا الفريد وهبدأ تصوير فيديوهات لو انت وصلت للجزئية دي ليك عندي هدية خلي بالك😅❤❤

تتمسوا بالخير ولو عايزين تعرفوا معلومات اكتر ياريت تزوروا الموقع الرسمي لشركة ابل وبلاش تسمعوا كلام الهبادين العرب لان بجد في ناس حرفيا مش بتفهم بمليم احمر وبتهبد هبد السنين حافظه مش فاهمه زي ما بيقولوا!

تتمسوا بالخير يا حبايب قلبي❤❤